阿咩剧场
今朝，一觉瞓醒，发现经已9点！
当堂鸡咁脚咁换衫换裤，刷牙洗面。
妈子见我匆匆忙忙，冇鞋挽屐走咁，
就同我讲：“唔好咁惊青啦女，你日日都迟到噶啦！”
我当场火都嚟埋！“唔系惊青！系擒青啊！”
粤语里面，有好多容易令人搞错嘅词语，
就算系地道广州人，都有可能会搞错用错。
所以对于粤语，我哋唔应该“不求甚解”！
擒青：形容好急，好匆忙。
惊青：形容好紧张，唔知道如何是好。
扎扎跳：形容被激亲，激到上蹿下跳。
跳扎扎：形容小朋友活泼好动，跳上跳落。
震腾腾：形容手脚唔灵活，如：陈伯中风之后，行步路都震腾腾。
腾腾震：形容被吓得好严重。如：梁师奶寻晚畀人打劫，依家仲腾腾震。
眼光光：形容双眼无神。
眼甘甘：形容眼神带住渴望。
屈质：形容地方细、狭窄。
甩质：形容麻烦、糟糕。
除咗呢啲容易混淆嘅词之外，
唔识粤语嘅人，对下面嘅粤语词，
肯定睇到一头雾水！
“水鱼”虽然真系一种鱼，但粤语里面“水鱼”并唔系表示呢种动物，而系形容一个人好容易受骗，容易受人摆布。
“大头佛”同样唔系表示一种“神佛”，而系形容一堆麻烦事。
好多外地人以为“踢脚”系一个动词，但喺粤语里面，“踢脚”其实系一个形容词，系形容好忙，忙到不可开交。
唔好以为“热气”真系一种热嘅气体，喺广府地区，“热气”系形容食得多燥热嘢而上火。
你仲知道边啲容易令人误解嘅粤语词？
发出嚟畀大家睇睇！
综合自《老饼潮语》、《地道粤语》、《广州话俗语词典》
羊城网负责编辑整理
童说岭南系列丛书
《街巷探秘》、《广饮广食》、《小脚走古迹》
同小朋友一齐分享好多广州人都唔知嘅古仔！